Thaana-Alphabet

S'Thaana-Alphabet (Divehi: ތާނަ‎, aa Tāna gschrim) is s'Alphabet vu da Sproch vu de Malediven, im Divehi.

S'Divehi is a indoarische Sproch, de Thaana-Schrift zaagt owa mea arabische wia indische Einflüsse. In da arabischn Schrift kau a Buachstob vaschiedene Foamen hom – des is im Thaana ned da Foi. S'Thaana is owa genauso a laudgebundene Schrift wia s'Arabische und ma schreibt aa vu rechts noch links. Nem am Thaana is aa a maledivische Lateinschrift in Vawendung („Dhivehi Letin“), hin- und heatransskribian is dabei koa Problem.

Im Thaana wean Vokale daduach gschrim, dass ma üwa oda unta'n voarign Mitlaud a Zusotzzeichn schriebt (oda a Sukun, wauns noch'm Konsonantn koan Vokal gibt). D'anzige Ausnauhm is s'Zeichn Noonu, des auzoagt, dass da foigende Plosiv zum pränasalian is und desweng ned vokalisiad wean muaß. De Vokalzeichn wean „fili“ gnennd und schaun zum Teu wia de arabischn Hüifszeichn zua Vokalisiarung aus (Fatha, Kasra, Damma). Im Divehi brauchd ma owa ned netta drei Vokale, sondan fümf fia an kuazn und fümf fia an laungen Vokal (in da Umschrift wean de daun a, e, i, o, u; aa, ee, oo, ey, oa gschrim). Bis aufs oa schaun de Laung-Fili olle aus wia s'Doppide vum Kuaz-Fili.

S'„Alifu“is a Zeichn ohne Laudweat. Ma nimmds dafia ois Träga vu am Vokal hea, dea ned auf noch am Konsonantn kimmd (Woataufaung,Diphthong). Alifu+Sukun valängat in Konsonantn, dea nochhea kimmd (bei Nasallaute wiad des duach a voagstöids Noono+Sukun gmocht), Alifu+Sukun am End vu am Woat haaßt, dasss Woat auf /eh/ endet.

Bei'm Unicode-System san de Thaana-Zeichen auf de Positionen 1920 bis 1983 (hexadezimal 0x780–0x7BF) zum findn.